Taparhatopot do na mansai godang situtu sitaonon
ni Apostel Paulus ala silang ni Tuhan i. Alai ndada holan na manghilala godang
ni haporsuhon Apostel Paulus, dihilaa ibana do nang pangapulion na sumurung
dijalo sian Kristus i. Lapatanna, ndada holan siarsakhonon sambaing angka
haporsuhon i Godang do disi nang na gabe sihalashonon nang haporsuhon (Rom
5:3-5) Tusi do hita ditogu laho mangantusi angka haporsuhon na songgop tu hita.
Adong do pangkirimon di angka naporsea jala na
marbenget ni roha di sitaononna, na hot so muba-uba haporseaonna atik pe masa
haporsuhon. Asa na mangolu do na porsea i dibagasan pangkirimon (Pat. Rom
5:5a). Pangkirimon di angka naporsea i ma : manjalo apul-apul sian Debata molo
mangadopi sitaonon; jala pangkirimon ima partohap manang parjambar di hangoluan
sogot ima sijalooonni na benget di haporsuhon, na monang maralohon
sitaonon sahat rod i ujungna (pangk.2:7a, 10b)
Rangkuman :
1. Asa gabe halak na tongtong
sipuji Debata hita disaluhut pardalan ni ngolunta. Halak na tongtong mamuji
Debata, ima na marnida denggan basa na nilehon ni Debata tu ibana, manang aha pe namasa tu ngoluna
tongtong mampu mamuji Debata jala mandok mauliate.
2. Naeng ma hita mamparangehon
songon na pinarangehon ni Kristus i, i ma manaon sitaonon. Asa ndada gabe bonsir ni pandelean sitaonon, manang
gabe mula ni ngolu na so marpanghirimon.
Gariada ala ni sitaonon i gabe lam marsihohot hita mangihuthon Kristus.
3. Naeng ma gabe tiruan ngolu ni na
porsea di habengetonna i, boi mangapuli halak na marsitaonon. Asa
molo masa pe sitaonon, ingkon lam patoguhon haporseaonta ma i, jala asa maporus hita tu Debata di sitaonon i. Ai
Debata sambaing do na tuk mandongani hita, mangalehon gogo dohot manghamonanghon hita maralohon sitaonon i (1 Pet
5:9-11). Angkup ni i, ingkon
rajumanta do sitaonon i gabe tingki na une laho papitahon haporseaonta.
4. Asa manontong hita dibagasan
pangkirimon. Ianggo
nagabe ojahan ni panghirimonta, ima Jesus Kristus. Ibana do na manaon naporsuk
di bagasan benget ni roha sahat tu
hamatean, alai gabe monang do ibana di na hehe sian hamatean. Ala ni i do didok Ap. Paulus, marojahan tu haheheon
Kristus manaluhon na porsuk dohot
hamatean i, “hot ma hamu so mubauba” (1 Kor 15:58). Marhite i ma hita
gabe partohap di ragam ni
denggan basa ni Debata si jaloonta di hasiangan jala na sumurung jaloon muse di ngolu sogot. “Asa ndang
magopo halojaonmuna (sitaononmuna) dibagasan Tuhan”
(Kor 15:58b).